Jóhanna Margrét Sigurðardóttir átti stórleik og var best á leikvellinum þegar lið hennar, Skara HF, vann óvæntan sigur á Svíþjóðarmeisturum IK Sävehof, 24:23, í fyrstu umferð undanúrslita sænsku úrvalsdeildarinar í dag. Leikurinn fór fram í Partille, heimavelli Sävehof sem gerir úrslitin ennþá athyglisverðari.
Jóhönnu Margréti héldu engin bönd. Hún skoraði átta mörk og var markahæsti leikmaður vallarins. Þar á meðal skoraði Jóhanna fjögur af síðustu fimm mörkum liðsins, eitt af þeim var 24. markið, 47 sekúndum fyrir leikslok. Sennilega var þetta besti leikur Jóhönnu á nærri tveggja ára veru hjá Skara-liðinu.
Aldís Ásta Heimisdóttir skoraði eitt mark og stýrði leik liðsins að vanda af festu.
Sävehof var tveimur mörkum yfir í hálfleik, 12:10.
Næsta viðureign liðanna verður í Skara á þriðjudaginn. Vinna þarf þrjá leiki til þess að komast í úrslit.
