ÍBV var fyrir áfalli í viðureigninni við Aftureldingu í Olísdeild karla í dag þegar markvörðurinn Petar Jokanovic tognaði að því er virtist í aftanverðu hægra læri eftir 18 mínútna leik. Sé svo er sennilegt að Joknaovic stendur ekki í marki ÍBV næstu vikur.
Jokanovic meiddist er hann freistaði þess að verja vítakast. Eftir að hafa fengið aðhlynningu var hann aðstoðaður af leikvelli þar sem kæling var sett á lærvöðvann.
Jokanovic er þrautreyndur markvörður sem hefur lengi leikið með ÍBV.
Ungur markvörður, Morgan Goði Garner, lék það sem eftir var leiksins í marki ÍBV. Hann verður að standa vaktina næstu vikur ásamt öðrum ungum markverði, Sigurmundi Gísla Unnarssyni, sem staðið hefur vaktina með HBH á leiktíðinni en var í 17 ára landsliðinu sem vann til gullverðlauna á Ólympíuhátíð Evrópuæskunnar í sumar.
