Jón Þórarinn ætlar að verja mark FH

Selfyssingurinn og markvörðurinn Jón Þórarinn Þorsteinsson hefur skrifað undir tveggja ára samning við handknattleiksdeild FH. Jón Þórarinn, sem fæddur er árið 2003, kemur frá uppeldisfélaginu sínu Selfossi.

Jón Þórarinn hefur verið annar tveggja markvarða Selfoss undanfarin tvö ár en liðið endurheimti sæti sitt í Olísdeildinni á sunnudaginn eftir árs fjarveru.

Jón Þórarinn var einn markvarða 21 árs landsliðsins sem vann til bronsverðlauna á HM fyrir tveimur árum.