Karen Tinna Demian og Dagur Sverrir Kristjánsson eru handknattleiksfólk ársins hjá ÍR. Þau tóku á móti viðurkenningum því til staðfestinar á árlegri verðlaunaafhendingu félagsins sem fram fór 27. desember.
„Karen er nú fyrirliði liðsins sem hefur farið vel af stað í deildinni og situr nú taplaust á toppi deildarinnar. Mikilvægi hennar er ekki einungis inn á vellinum en einnig er hún frábær liðsmaður og fyrirmynd fyrir aðra leikmenn. Hún er mikill ÍR ingur og er ávalt reiðubúin að stíga inn og aðstoða félagið í hinum ýmsum verkefnum. Auk þess tekur Karen Tinna þátt í að bæta utanumhald um liðið og er mikið í mun að bæta kvennastarf félagsins.
Handboltamaður ÍR 2022 er Dagur Sverrir Kristjánsson. Dagur Sverrir er einnig uppalinn ÍR-ingur og endaði næst markahæsti leikmaður Grill deildarinnar. Dagur var í lykilhlutverki í ÍR liðinu sem tryggði sér sæti í Olís deildinni á síðastliðnu tímabili.
Á þessu tímabili hefur Dagur verið í stóru hlutverki í liði okkar ÍR-inga sem berst fyrir sæti sínu í efstu deild. Mikill stígandi hefur verið í leik hans í vetur og er gaman að sjá hann vaxa og dafna á stóra sviðinu. Dagur kemur einnig að yngri flokka starfi félagsins þar sem hann þjálfar 6.fl kk. við góðan orðstír og er okkur afar mikilvægur í þeirri uppbyggingu sem félagið stendur í,“ segir í tilkynningu frá handknattleiksdeild ÍR.
