Handknattleiksmaðurinn Teitur Örn Einarsson hefur jafnað sig af höfuðmeiðslum sem hann hlaut á æfingu fyrir nokkru og gerðu að verkum að hann sat yfir í fyrstu viðureign Kristianstad og Malmö í 8-liða úrslitum sænsku úrvalsdeildarinnar í handknattleik á dögunum. Einnig lék hann með liðinu aðeins í stuttan tíma í annarri viðureign Kristianstad og Malmö á síðasta laugardag af sömu sökum.
Teitur staðfesti við handbolta.is í morgun að hann verði með liðinu gegn Malmö í kvöld í Baltiska Hallen.
Kristianstad og Malmö mætast þá í þriðja sinn og með sigri tryggir Kristianstad sér sæti í undanúrslitum eftir að hafa hreppt tvo vinninga í fyrstu tveimur leikjum liðanna í 8-liða úrslitum.
Malmö hafnaði í þriðja sæti úrvalsdeildarinnar en Kristianstad í sjötta.
Eftir helgina mætir Kristianstad spænska liðinu Ademar León tvisvar í 16-liða úrslitum Evrópudeildarinn. Fyrri leiknum, sem fram átti að fara á Spáni á síðasta þriðjudag, varð að fresta vegna smita kórónuveiru í herbúðum Ademar.
