„Fínt að fá tvö stig en leikur okkar var kaflaskiptur,“ sagði Einar Jónsson þjálfari karlaliðs Fram eftir sigur á KA, 34:28, í sjöttu umferð Olísdeildar karla í handknattleik í Lambhagahöllinni í Úlfarsárdal í kvöld. Fram var einnig sex mörkum yfir í hálfleik, 19:13, en tapaði þræðinum niður framan af síðari hálfleik svo að um skeið var munurinn aðeins eitt mark.
„KA-menn voru baráttuglaðir í síðari hálfleik og við koðnuðum svolítið niður. Ég verð bara að segja eins og er að fyrstu 13 til 14 mínúturnar í síðari hálfleik voru virkilega lélegar af okkar hálfu. Við kláruðum báða hálfleika mjög vel. Það skapaði sigurinn,“ sagði Einar en Fram hefur nú átta stig eftir sex viðureignir.
„Það er eiginlega ekkert meira um þetta segja. Úrslitin eru bara fín,“ sagði Einar Jónsson þjálfari Fram stutt- og gagnorður eftir viðureignina í kvöld þegar handbolti.is rakst á hann á löngum gangi við búningsklefana í Lambhagahöllinni.
Fram fór upp að hlið Gróttu og FH eftir sigur í kaflaskiptum leik
Staðan og næstu leikir í Olísdeildum.
