„Valið kom mér á óvart,“ sagði Eyjamaðurinn Elliði Snær Viðarsson, leikmaður Gummersbach, þegar handbolti.is heyrði í Elliða eftir að hann var valinn í íslenska landsliðshópinn í handknattleik karla sem tekur þátt í HM í Egyptalandi og tveimur leikjum við Portúgal í undankeppni EM2022. Leikirnir tveir fara fram 6. og 10. janúar, að heiman og heima, í aðdraganda heimsmeistaramótsins.
Elliði er einn þriggja leikmanna í landsliðshópnum sem Guðmundur Þórður Guðmundsson, landsliðsþjálfari, tilkynnti um val á í gærmorgun, sem ekki hefur tekið þátt í stórmóti með A-landsliðinu. Hinir eru Kristján Örn Kristjánsson, Donni, og Magnús Óli Magnússon.
„Þetta er mjög spennandi og ég hlakka mikið til að komast á æfingar með landsliðinu í byrjun janúar,“ segir Elliði Snær sem er 22 ára gamall og hefur tekið miklum framförum á síðustu mánuðum eftir vistaskiptin til Gummersbach undir sumarlok, að sögn Guðmundar Þórðar þegar hann rökstuddi val sitt á leikmannahópnum.
Þjálfari Gummersbach er Guðjón Valur Sigurðsson sem tók þátt í 22 stórmótum með A-landsliðinu og á þar af leiðandi auðvelt með að deila reynslu sinni til lærisveinsins.
„Markmiðið mitt hefur í mörg ár verið að komast í A landsliðið,“ sagði Elliði Snær sem veit ekki hvert hlutverk hans verður í hópnum. „Það kemur bara í ljós.“
