„Þetta er risastór andstæðingur sem hafnaði í fjórða sæti á HM í desember. Verkefni okkar er stórt en við höfum búið okkur eins vel undir það og hægt er. Ég hef því fulla trú á að við komum vel gíraðar í leikinn til þess að gera okkar allra besta,“ sagði Katla María Magnúsdóttir landsliðskona í handknattleik í samtali við handbolta.is um leikina við Svía í undankeppni Evrópumótsins.
Fyrri viðureignin fer fram á Ásvöllum í Hafnarfirði í kvöld og hefst klukkan 19.30. Frítt er inn á leikinn í boði Arion banka.
„Markmiðið er að ná sem bestum leik og að stríða sænska landsliðinu. Eins og staðan er ætlum við að gera okkar allra besta og búa okkur þannig vel undir úrslitaleikina í riðlinum sem fram fara eftir mánuð,“ sagði Katla María Magnúsdóttir landsliðskona frá Selfossi.
Staðan í 7. riðli undankeppni EM:
| Svíþjóð | 2 | 2 | 0 | 0 | 76:37 | 4 |
| Ísland | 2 | 2 | 0 | 0 | 60:37 | 4 |
| Færeyjar | 2 | 0 | 0 | 2 | 43:65 | 0 |
| Lúxemborg | 2 | 0 | 0 | 2 | 31:71 | 0 |
- Síðari leikurinn við Svía fer fram í Karlskrona á laugardaginn og hefst klukkan 13.
- Tvær síðustu viðureigninar verða 3. og 7. apríl gegn Lúxemborg ytra og á við Færeyinga á Ásvöllum 7. apríl.
- Tvö efstu lið riðilsins verða örugg um sæti í lokakeppni EM sem fram fer í Austurríki, Ungverjalandi og Sviss í desember. Einnig halda áfram keppni fjögur lið sem ná bestum árangri í þriðja sæti í riðlakeppnini. Undankeppnin er leikin í átta riðlum.
