Kúbumenn reka lest þeirra 32 liða sem tóku þátt í heimsmeistaramóti karla í handknattleik 2025. Kúba tapaði í dag fyrir Gíneu í leiknum 31. sæti á heimsmeistaramótinu, 33:31, að lokinni í vítakeppni. Staðan var jöfn að loknum 60 mínútna leik, 28:28. Var þá gripið til þess að útkljá leikinn í vítakeppni en í henni voru leikmenn Gíneu öryggið uppmálað, skoruðu örugglega úr fimm vítaköstum en Kúbumenn úr þremur, þar á meðal brást þeim bogalistin í fyrsta vítakastinu.
Athygli vakti að eftir að Gíneumenn höfðu skorað úr fjórum fyrstu vítaköstum sínum á sama tíma og Kúba hafði skorað úr tveimur var báðum liðum skipað að taka eitt vítakast í viðbót þótt engin möguleiki væri á að Kúbumenn gætu jafnað metin. Gíneumenn voru byrjaðir að fagna sigri í leiknum þegar dómarar leiksins sögðu eina umferð vera eftir og henni yrði að ljúka hvort sem mönnum líkaði betur eða verr. Alla jafna eru fimm umferðir í vítakeppni en henni er samt yfirleitt hætt ef sú staða kemur upp að annað liðið getur ekki jafnað metin úr þeim vítaköstum sem eftir eru eins var í þessu tilefelli.
Gínea og Kúba voru á meðal átta liða í svokallaðri forsetabikarkeppni sem er vettvangur fyrir lökustu lið HM til þess að leika fleiri leiki á alþjóðlegu handknattleikssviði.
Landslið Kúbu tapaði fyrir íslenska landsliðinu með 19 marka mun á HM 2025, 40:21. Kúba lék sjö leiki á HM og tapaði öllum.
Í kvöld leika Pólland og Bandaríkin um 25. sæti HM og um sjálfan forsetabikarinn. Viðureignin hefst klukkan 19.30 í íþróttahöllinni í Poreč í Króatíu sem hefur verið leikstaður keppninnar frá 21. janúar.
Aðrir leikir í dag um neðstu sætin:
29. sætið: Alsír – Barein, kl. 14.30.
-Aron Kristjánsson er þjálfari Barein.
27. sætið: Kúveit – Japan, kl. 17.
25. sætið: Pólland – Bandaríkin, kl. 19.30.
