Lettneski landsliðsmaðurinn Endijs Kusners hefur skrifað undir nýjan tveggja ára samning við handknattleiksdeild karla Harðar á Ísafirði. Kusners líkar lífið á Ísafirði því hann hann hefur þegar verið í fjögur ár hjá Herði og ljóst að ekkert fararsnið er á honum.
Kusners hefur reynst Herði happafengur og verið liðinu öflugur jafnt í vörn sem sókn og sýnt einstaka hæfileika, eins og sagt er í tilkynningu Harðar handknattleiksdeildar í dag. Hann var nokkuð frá keppni vegna meiðsla á síðustu leiktíð og skoraði t.d. 22 mörk í fimm leikjum í Grill 66-deildinni.
„Við erum stolt af því að hafa Endijs með okkur í liði næstu árin og hlökkum til að sjá hvað framtíðin ber í skauti sér með hann í hópnum,“ segir í tilkynningu Harðar í dag.
Hörður féll úr Olísdeildinni vorið 2023 en tapaði í vor fyrir Þór í undanúrslitum umspils Olísdeildar karla eftir mikinn endasprett í Grill 66-deildinni.
Forráðamenn Harðar heita því að fleiri tilkynningar séu væntanlegar á næstu dögum um nýja samninga enda eru þeir hvergi af baki dottnir.
