Kveður Gróttu og klæðist búningi Fram

Handknattleiksmaðurinn Ívar Logi Styrmisson hefur skrifað undir tveggja ára samning við Fram. Hann kemur til félagsins frá Gróttu hvar hann lék sem lánsmaður frá ÍBV í Olísdeildinni í vetur.

Ívar er 22 ára fjölhæfur leikmaður sem flutti til Reykjavíkur frá Vestmannaeyjum í fyrra. Hann á fjölda leikja með yngri landsliðunum. Ívar Logi skoraði 26 mörk í 22 leikjum með Gróttu í Olísdeildinni í vetur. Keppnistímabilið 2020/2021 tók Ívar Logi þátt í 20 leikjum með ÍBV í Olísdeildinni.

Þess má geta að Ívar Logi er bróðir Andra Heimis Friðrikssonar sem eitt sinn lék m.a. með Fram en var liðsmaður ÍR og aðstoðarþjálfari í vetur. Annar bróðir Ívars Loga er Hákon Daði Styrmisson leikmaður Gummersbach í Þýskalandi.