- Auglýsing -
- Sigurræða nýkjörins formanns KKÍ á dögunum er án efa sú lágkúrulegasta sem formaður sérsambands hér á landi hefur flutt allsgáður. Í stað þess að gleðjast yfir sigrinum eftir góða kosningu, þakka fyrir stuðninginn, horfa til framtíðar og blása fólki baráttuanda í bjóst, notaði formaðurinn tækifærið til að gera lítið úr annarri íþróttagrein innan sérsambands ÍSÍ.
- Hvað í veröldinni rak nýkörinn formann í þessa lágkúru er mér og fleirum hulið. Ekki veit ég betur en að gott samstarf hafi verið á milli KKÍ og HSÍ.
- Hvert var tilefnið sem rak formanninn til að leggjast svona lágt á sigurstundu að halda nærri þriggja mínútna ræðu sem helst væri brúkhæf í hallæri á slarkfæru herrakvöldi?
Það vill oft gleymist að indverskt rottuhlaup er helvítis íþrótt 🐀
— Stymmi Klippari (@StySig) March 23, 2025
Hvað sem því líður þà breytir það ekki þeirri staðreynd að þetta er einhver slakasta sigurræða sögunnar pic.twitter.com/WVXiZOEC3F
- Eitthvað áratugagamalt þvaður yfir súpudisk í hádeginu í kaffiteríu ÍSÍ hefur greinilega legið þungt á nýkjörnum formanni. Honum hefur greinilega ekki orðið svefnsamt um árabil. Vonandi líður honum betur eftir hafa loksins fundið tilefni til að létta oki af sálu sinni og hjarta.
- Dapurlegt er að heyra að einhverjum fundarmönnum þótti nýkjörnum formanni mælast svo vel að tilefni væri til að verðlauna hann með hlátri.
- Satt að segja átti ég von á að íslensk íþróttahreyfing væri alsgáð lengra komin á þroskabrautinni en raun ber vitni um.
- Fyrir hálfum öðrum áratug eða þar um bil skrifaði ég viðhorfsgrein í Morgunblaðið, hvar ég starfaði þá. Fjallaði greinin um það hversu dapurlegt væri að heyra íþróttamenn annarra greina upphefja sjálfan sig eða íþrótt sína á kostnað annarra geina. Ljóst er á umræðum síðustu daga að lítið hefur breyst í þeim efnum. Fleiri en nýkjörinn formaður KKÍ hafa kosið að opinbera minnimáttarkennd sína.
- Talsverð viðbrögð fékk ég við greininni á sínum tíma. Flest þeirra voru fyrirséð enda sprottin af þeim meiði sem varð tilefni greinarskrifanna.
- Einn þáverandi forsvarsmaður sérsambands hafði samband við mig og sagðist vera miður sín ef ég ætti við fólk úr sinni hreyfingu. Svaraði ég honum og sagði sneiðina ekki ætlaða hans fólki. Ljóst er mér nú svo löngu síðar að ekki hafði sá ágæti maður samband við mig að ástæðulausu.
Ívar Benediktsson, [email protected].
- Auglýsing -
