Landi þjálfarans hefur samið við Þór Akureyri

Forráðamenn Þórs á Akureyri virðast hafa í hyggju að styrkja liðið fyrir átökin i Grill66-deild karla í handknattleik. Eftir því sem fram kemur á ekipa.mk í Norður Makedóníu hafa Þórsarar, fyrir milligöngu þjálfara síns, Stevce Alushovski, samið við örvhentan leikmann, Tomi Jagurinovski. Hann er landi þjálfarans og kemur frá Vardar í Skopje.

Jagurinovski getur leikið sem skytta hægra megin eða leikið í hægra horni. Hann er fyrrverandi unglingalandsliðsmaður Norður Makedóníu og var undir handarjaðri Alushovski þjálfara sem stýrði Vardar á síðustu leiktíð. Þar áður var hann í herbúðum Metalurg.

Jagurinovski hefur ekki verið í náðinni hjá Veselin Vujovic sem tók við þjálfun Vardar í sumar. Því mun hann hafa tekið fegins hendi tilboði frá Þór, eftir því sem segir í frétt ekipa.mk.