Búningur íslenska landsliðsins í handknattleik karla verður til sölu fyrir stuðningsmenn landsliðsins í Zagreb í dag. Kjartan Vídó Ólafsson markaðsstjóri HSÍ staðfesti við handbolta.is í morgun að nokkrar töskur væru á leiðinni til Zagreb og stefnt væri á að selja búningana á samkomu Sérsveitarinnar, stuðningssveitar landsliðanna, sem fram fer á veitingastaðnum Johann Frank í miðborg Zagreb. Samkoman hefst klukkan 16 að staðartíma.
Reynir Stefánsson varaformaður HSÍ kemur til Zagreb í dag og sér hann um að búningarnir skili sér á veitingastaðinn og mun hafa umsjón með sölunni.
Um er að ræða búninga sem HSÍ var með á lager og áttu að nýtast landsliðunum næstu mánuði. Í ljósi þess að innflytjandi búninganna, Sportmenn, hefur ekki fengið afgreiddar pantanir frá Adidas var ákveðið að HSÍ seldi hluta af þeim búningum sem sambandið á.
