Leikmenn ungverska liðsins FTC (Ferencváros) spara sannarlega kraftana fyrir leikinn við Valsmenn í 1. umferð B-riðils Evrópudeildarinnar í handknattleik karla. Telja væntanlega fyrir víst að ekki muni veita af þeim í kvöld.
FTC-liðið æfði í morgun í Origohöllinni sem ekki er í frásögur færandi nema hvað þeir pöntuðu rútu til þess flytja sig frá Natura Hotel Reykjavík yfir í Origohöllina. Sami háttur var væntanlega hafður á eftir æfingu.
Aðeins er nokkurra mínútna gangur frá Natura Hotel Reykjavík (eitt sinn Hótel Loftleiðir) og að Origohöllinni. Þess utan er fyrirtaks haustveður í Reykajvík, þurrt en sólarlítið og hiti um sjö gráður.
Leikur Vals og FTC hefst í Origohöllinni klukkan 18.45 í kvöld.
Ennþá er hægt að verða sér út um aðgöngumiða á leikinn hjá Tix.is.
