„Ég nota bókina mikið og fletti upp í henni ýmsu sem varðar skipulag leiksins og eins punkta ég niður hvað gerist í leikjum og á æfingum. Bókin hefur fylgt mér frá því að ég byrjaði að þjálfa,“ segir Arnar Pétursson landsliðsþjálfari kvenna í handknattleik. Athygli hefur vakið minnisbók sem hann hefur oft við höndina í leikjum landsliðsins á heimsmeistaramótinu.
Arnar velti oft vöngum yfir bókinni meðan viðureign Íslands og Úrúgvæ stóð yfir á sunnudaginn í Porsche Arena.
Hafliði Breiðfjörð ljósmyndari tók syrpu mynda af Arnari með bókina við höndina í áður nefndum leik.
-Smellið á myndirnar til að sjá þær stærri.
Var mjög kærkomið
„Leikurinn þróaðist þannig að okkur tókst að rúlla inn atriðum sem við höfum ekki haft mörg tækifæri til að láta á reyna. Þannig að maður var snemma farinn að skoða leikinn með tilliti til atriða sem ég hafði skrifað í bókina. Það var mjög kærkomið,“ sagði Arnar er handbolti.is innti hann eftir minnisbókinni sem fylgt hefur Arnar frá því að hann byrjaði að þjálfa.
Eftir viðtalið fékk handbolti.is að líta stuttlega í bókina og þótt þekkingu hafi skort hjá blaðamanni mátti þar sjá margs konar skipulag leiksins teiknað og skrifað niður á einkar snyrtilegan hátt í mörgum litum. Sannkallaður leyndardómur landsliðsþjálfarans.
