„Ég finn kannski aðeins meira fyrir leiknum í gær og ligg meira upp í rúmi meðan peyarnir spila á spil. Ég geri bara það sem ég þarf til þess að jafna mig,“ sagði Janus Daði Smárason landsliðsmaður í handknattleik spurður hvernig hann hafi það líkamlega í dag eftir átökin gegn ítalska landsliðinu í gær.
Janus Daði fór á kostum og lék um leið, e.t.v. meira en um langt skeið. Hann missti nærri tvo mánuði út fyrir áramótin vegna meiðsla og er því ekki jafn góðu spilformi og stundum. Þess varð þó ekki vart í leiknum við Ítala. Eftir viðureignina sagðist Janus Daði vera þrekaður og þörf væri á góðum tíma til að jafna sig fyrir átökin gegn Pólverjum á morgun, mánudag.
Líður bara eins og ég sé 24 ára
„Ég var aðeins lúinn í morgun en var fljótur að jafna mig. Maður nær þessu úr sér með léttri æfingu í dag og síðan sjúkraþjálfun. Svo fer maður aðeins í ræktina til þess að halda sér sem ferskustum. Mér líður bara eins og ég sé 24 ára,“ segir Janus Daði Smárason, landsliðsmaður í handknattleik, galvaskur að vanda.
Landslið Íslands á EM 2026 – strákarnir okkar
EM karla 2026 – úrslit, staðan og leiktímar
