Rúnar Kárason handknattleiksmaður hjá Fram og fyrrverandi leikmaður og samherji Kára Kristjáns Kristjánssonar hjá ÍBV segir viðskilnað og samskipti ÍBV við Kára Kristján minna sig á fjölskylduharmleik sem fari fram fyrir opnum tjöldum. Skiljanlega sé erfitt og leiðinlegt að fylgjast með. Eins og komið sé málum eigi Kári Kristján skilið að félagið biðji hann afsökunar á því hvernig endi var bundinn á samstarf félagsins við hann.
Rúnar skrifað færslu á Facebook í gær þar sem hann fór yfir málið frá sínum bæjardyrum m.a. sem fyrrverandi leikmaður ÍBV, vinur og samherji Kára Kristjáns til margra ára, bæði með ÍBV og landsliðinu. Kári Kristján og Rúnar voru saman í Íslandsmeistaraliði ÍBV vorið 2023.
Eins og fram kom fyrir helgina í viðtali við Kára Kristján hjá Handkastinu ákvað ÍBV að bjóða Kára Kristjáni ekki nýjan samning á dögunum eftir að munnlegt samkomulag virtist vera í höfn í vor.
Skýringar af hálfu ÍBV hafa verið litlar Eyjamanninum Kára Kristjáni til handa. Yfirlýsing ÍBV á síðasta föstudag var að margra mati rýr í roðinu og vakti e.t.v. upp fleiri spurningar en hún svaraði.
Ræða skal augnliti til augnlitis
„Nú á ég ekkert með það að gera að segja íþróttafélögum hvernig þau eiga að reka sig og ÍBV ber engin skylda til að semja við hann Kára vin minn.
En mér finnst persónulega skipta máli að ef ákvörðunin er að láta leiðir skilja af hálfu félagsins, þá á bara að segja það, augnliti til augnlitis sama hversu erfitt eða óþægilegt það samtal er,“ skrifar Rúnar í færslu sinni.
Stærsti prófíll handboltans frá Eyjum
„Mér finnst það morgunljóst að Kári er sá handknattleiksmaður sem kemur frá Eyjum sem hefur náð hvað lengst, er stærsti prófíll handboltans frá Eyjum og ofan á það hefur hann unnið fyrir ÍBV af heilindum í fjölda mörg ár. Langt umfram laun eða starfslýsingar
Ég upplifi þetta mál sem fjölskylduharmleik og það er erfitt og leiðinlegt að fylgjast með því.
Ég vona að hér verði mistök viðurkennd og ég vona að Kári fái afsökunarbeiðni á því hvernig samstarfinu lauk því hann á það skilið,“ segir Rúnar ennfremur en færslu hans í heild er hægt að sjá hér fyrir neðan.
