Lilja Ágústsdóttir landsliðskona í handknattleik og leikmaður meistaraliðs Vals er illa tognuð á vinstra ökkla eftir að hafa meiðst í leik með landsliðinu gegn Házená Kynžvart í Cheb í Tékklandi á síðasta föstudag. Verður líklegast frá æfingum og keppni næstu 4-5 vikur.
Þetta staðfesti faðir Lilju og þjálfari Vals, Ágúst Jóhannsson, í stuttu spjalli við handbolta.is fyrr í dag.
Stigið var í veg fyrir Lilju þegar hún fór inn í vinstra horninu í leiknum. Ljóst var strax að meiðslin væru alvarleg.
Næsti leikur Vals verður við Fram í Olísdeild kvenna á miðvikudagskvöld í Lambhagahöll Framara í Úlfarsárdal. Eftir það taka við hjá Valsliðinu tveir leikir í Evrópubikarkeppninni gegn Zalgiris Kaunas í Litáen á laugardag og sunnudag.
Hætt er við að Lilja verði ekki landsliðinu í tveimur vináttuleikjum við Pólverja hér á landi eftir mánuð. Aðeins tveir mánuðir eru þangað til Evrópumótið hefst.
