Lovísa Thompson hefur skrifað undir nýjan tveggja ára samning við Íslandsmeistara Vals. Lovísa hefur leikið með Val frá árinu 2018 þegar hún kom frá Gróttu.
Lovísa hefur fagnað fjórum meistaratitlum með Val; einu sinni deildarmeistari, einu sinni Íslandsmeistari og tvisvar bikarmeistari. Einnig hefur hún orðið Íslandsmeistari með uppeldisfélagi sínu Gróttu.
Lovísa, sem leikið hefur 21 landsleik og skoraði í þeim 56 mörk, var frá keppni á síðasta tímabil vegna meiðsla en hefur sótt í sig veðrið á nýjan leik á þessu keppnistímabili með Valsliðinu sem er efst í Olísdeildinni með 32 stig eftir 17 leiki.
Lovísa er fjölhæf og getur leikið allar stöðurnar fyrir utan í sókn og er sterk í vörn hvort sem það sé í stöðu bakvarðar eða í miðju varnarinnar.
Lovísa var í stuttan tíma hjá danska úrvalsdeildarliðinu Ringkøbing haustið 2022.
