Katrine Lunde fremsti markvörður heims um margra ára skeið hefur samið við serbneska liðið Rauðu stjörnuna (Crvena Zvezda). Lunde, sem er 45 ára gömul, hefur verið án félags frá því í júní að skammtímasamningur hennar við danska meistaraliðið Odense Håndbold rann út.
Samningur Lunde við Rauðu stjörnuna er til loka ársins og mun hún ferðast á milli Noregs og Belgrad með reglubundnum hætti. Eiginmaður Lunde og dóttir búa áfram í Noregi.
Eiginmaður Lunde, Nikola Trajkovic, er Serbi og segist Lunde líta á Belgrad sem sitt annað heimili. Trajkovic lét af störfum hjá serbneska liðinu Mladost Lučani fyrr á þessu ári.
Lunde er helsta tromp Rauðu stjörnunnar í komandi leikjum í forkeppni Evrópudeildarinnar. Liðið mætir Spono Eagles frá Sviss í fyrstu umferð forkeppni Evrópudeildarinnar í lok september og í byrjun október. Takist Lunde og Rauðu stjörnunni að komast í aðra umferð forkeppninnar verður henni lokið um miðjan nóvember áður en loka undirbúningur norska landsiðsins fyrir HM hefst.
Lunde ætlar að gefa kost á sér í landsliðið sem tekur þátt í HM. Hún er í landsliðshópi sem valinn var á dögunum til undirbúningsleikja síðar í mánuðinum.
