Lydía Gunnþórsdóttir skrifaði undir nýjan tveggja ára samning við KA/Þór og verður þar af leiðandi í eldlínunni með liðinu í Olísdeildinni á næstu leiktíð. KA/Þór hefur þegar tryggt sér efsta sætið í Grill 66-deildinni eftir taplaust tímabil.
Lydía sem verður 19 ára gömul seinna á árinu er uppalin hjá KA/Þór og hefur þrátt fyrir ungan aldur verið í lykilhlutverki í meistaraflokksliði KA/Þórs undanfarin ár. Lydía lék sinn fyrsta keppnisleik aðeins 15 ára gömul.
Auk þess að leika með KA/Þór hefur Lydía verið fastamaður í yngri landsliðum Íslands en hún lék meðal annars á HM í Kína á síðasta ári með U18 ára landsliðinu.
„Lydía er gríðarlega efnilegur leikstjórnandi, með mikinn leikskilning og er auk þess frábær skotmaður. Þá býr hún yfir miklum leiðtogahæfileikum og drífur liðsfélaga sína með sér. Það eru því afar jákvæð tíðindi að Lydía verði áfram innan okkar raða og hlökkum við svo sannarlega til að fylgjast áfram með framgöngu hennar,“ segir í heimasíðu Þórs.
Lydía er annar leikmaður KA/Þórs sem skrifað hefur undir nýjan samning á síðustu dögum. Rakel Sara Elvarsdóttir skrifaði undir árs samning á dögunum eins og handbolti.is hefur sagt frá.
