Margrét Einarsdóttir markvörður hefur skrifað undir tveggja ára samning við Olísdeildarlið Stjörunnar. Hún kemur til félagsins í sumar frá Haukum hvar hún hefur varið mark liðsins undanfarin fjögur ár og varð m.a. bikarmeistari í byrjun mars.
Margrét mun án efa koma með mikla reynslu inn í ungt og efnilegt lið Stjörnunnar og er mikilvægt púsl í framtíðaráætlunum félagsins sem ætlar sér stóra hluti á komandi árum, eftir því sem fram kemur í tilkynningu félagsins.
Byrjaði hjá Fylki
Margrét sem er uppalin hjá Fylki lék upp yngri flokka og í meistaraflokki Fylkis áður en hún gekk til liðs við Val 2019. Einnig var Margrét um skeið með KA/Þór meðan hún stundaði nám nyrðra.
Margrét hefur verið í æfingahópum landsliðsins og var m.a. þriðji markvörður landsliðsins í ferð til Serbíu fyrir þremur árum þegar landsliðið lék í undankeppni EM.
Til Hauka kom Margrét 2021 og mun ljúka leiktíðinni með liðinu en framundan eru úrslitaleikir um Íslandsmeistaratitilinn. Fyrsta viðureign Vals og Hauka fer fram annað kvöld á Hlíðarenda.
Öflugt markmannspar
„Margrét er sterkur markmaður og skemmtilegur karakter sem okkur hlakkar til að vinna með. Ég hef trú á því að Margrét og Hrafnhildur Anna munu skipa öflugt markmannspar hjá Stjörnunni á komandi leiktíð,“ segir Patrekur Jóhannesson þjálfari meistaraflokksliðs Stjörnunnar í tilkynningu.
