Sandra Erlingsdóttir og samherjar hennar í EH Aalborg máttu bíta í það súra epli að tapa sínum fyrsta leik í dönsku B-deildinni í handknattleik í dag er liðið mætti Ringköbing á heimavelli, 25:21.
Slæmur fyrri hálfleikur varð Söndru og félögum að falli en að honum loknum var liðið sex mörkum undir, 13:7. Þótt síðari hálfleikur væri betri dugði það ekki til að vinna upp muninn.
„Fyrri hálfleikur fór svolítið með þetta hjá okkur. Í seinni hálfleik fórum við í sjö á sex og komust þá inn í leikinn,“ sagði Sandra í skilaboðum til handbolta.is eftir leikinn.
Sandra skoraði fimm mörk, þar af þrjú úr vítaköstum, og var markahæsti leikmaður liðsins. Það gerði hún þrátt fyrir að hafa ekki jafnað sig eftir að hafa misstígið sig illa á hægri ökkla á æfingu fyrir liðlega viku síðan eins og handbolti.is sagði frá í gær.
EH Aalborg er enn í efsta sæti deildarinnar. Liðið hefur 14 stig að loknum átta leikjum. Ringköbing er með 13 og Hadsten 12 en á leik til góða gegn DHG í kvöld.
