„Varnarleikurinn var mjög góður hjá okkur og lagði grunninn að sigrinum. Markmið okkar fyrir leikinn var að vera þéttir í vörninni og mér fannst það ganga mjög vel,“ sagði Sverrir Andrésson markvörður Víkings í samtali við handbolta.is eftir öruggan sigur Víkinga á Fjölni, 32:25, í fyrstu viðureigninni í umspili um sæti í Olísdeild karla í Víkinni í kvöld.
Næsti leikur liðanna verður í Dalhúsum á föstudagskvöld.
„Það var smá skrekkur í upphafi og Fjölnir skoraði þrjú fyrstu mörkin. Við létum það ekki slá okkur út af laginu. Héldum okkur við skipulagið og það skilaði fljótlega árangri. Síðan tókst okkur að byggja ofan á gott forskot okkar strax í byrjun síðari hálfleiks og þar með náðum við góðum tökum á leiknum,“ sagði Sverrir en Víkingar voru komnir með átta marka forskot, 21:13, eftir nærri fjögurra mínútna leik í síðari hálfleik eftir að hafa skorað þrjú fyrstu mörkin.
Sverrir var mjög ánægður með hversu margir mættu á leikinn í kvöld. „Stemningin var frábær. Ég vonast til þess að sjá sem flesta í stúkunni á föstudaginn þegar við mætum í Dalhús.“
Nýbyrjaður eftir 13 mánaða hlé
Sverrir er nýlega byrjaður aftur eftir 13 mánaða fjarveru vegna höfuðhöggs. Hann lék með hlífðarhjálm í markinu í kvöld og hefur gert í síðustu leikjum. „Ég náði þremur leikjum í deildinni og gengur bara vel. Hjálmurinn er auka öryggi. Maður venst því að nota hann,“ sagði markvörðurinn öflugi sem lék vel í kvöld, ekki síst í fyrri hálfleik þegar Víkingar voru að byggja upp fimm marka forskot sitt sem þeir fóru með inn í hálfleikshléið, 18:13.
Myndaveislu Þorgils ljósmyndara Fjölnis frá leiknum í Safamýri í kvöld er að finna á Facebooksíðu Fjölnir handbolti.
