Ísak Steinsson, annar markvörður 20 ára landsliðs Íslands í handknattleik, hefur skrifað undir þriggja ára samning við norska úrvalsdeildarliðið Drammen. Gert er ráð fyrir að hann verði annar af tveimur markvörðum liðsins í norsku úrvalsdeildinni. Kristian Kjelling þjálfari Drammen bindur miklar vonir við Ísak.
Ísak hefur leikið með IL ROS sem er samstarfsfélag og ungmennalið Drammen undanfarin ár og varð m.a. norskur meistari í 3. flokki með OL ROS vorið 2023 eins og handbolti.is sagði m.a. frá á sínum tíma. Vegna tengsla IL ROS og Drammen þá hefur Ísak stöku sinnum hlaupið í skarðið sem annar markvörður Drammenliðsins sem hafnaði í fjórða sæti norsku úrvalsdeildarinnar í vor.
Ísak, er af íslensku bergi brotinn, en hefur búið nánast alla ævi í Noregi en valdi að leika fyrir Ísland eftir að hafa einnig staðið til boða að leika fyrir norsku unglingalandsliðin á sínum tíma. Ísak hefur leikið með U17, U18 og U19 ára landsliðum Íslands og er annar markvörður U20 ára landsliðsins sem hefur keppni á Evrópumótinu í Celje í Slóveníu eftir rúma viku, 10. júlí.
DHK: Ísak Steinssons (19) signerte for tre år
