Matthildur Lilja Jónsdóttir landsliðskona fer ekki í leikbann vegna rauða spjaldsins sem hún fékk undir lok viðureignar Íslands og Serbíu á heimsmeistaramótinu í handknattleik í gærkvöld. Jón Gunnlaugur Viggósson, hinn röggsami íþróttastjóri HSÍ, staðfesti í morgun að rauða spjaldið myndi ekki draga dilk á eftir sér fyrir Matthildi Lilju. Hann hafði kannað málið til hlítar.
Matthildur Lilja fékk rauða spjaldið fyrir að hafa gengið vasklega til varnar gegn serbneskum sóknarmanni sem lá eftir að loknum viðskiptum sínum við handknattleikskonuna ungu. Moldóvsku bræðurnir sem dæmdu leikinn litu á sjónvarpsupptöku áður en þeir felldu dóm sinn.
Næsti leikur á morgun
Matthildur Lilja getur því mætt galvösk til leiks gegn Úrúgvæ í lokaumferð riðlakeppninnar á morgun. Leikurinn við Úrúgvæ hefst klukkan 14.30 að íslenskum tíma í Porsche Arena í Stuttgart. Íslenska landsliðið verður að vinna leikinn til þess að komast í milliriðlakeppni í Dortmund. Tapi liðið leiknum færir það sig yfir til Hollands og leikur um forsetabikarinn.
