„Þær eru sterkar og líkar serbneska liðinu. Við sýndum það gegn Serbum að við gátum strítt þeim og viljum klárlega gera eins gegn Svartfjallalandi,“ sagði Sandra Erlingsdóttir fyrirliði landsliðsins spurð um andstæðing íslenska landsliðsins í dag á heimsmeistaramótinu í handknattleik, landslið Svartfjallalands. Flautað verður til leiks í Westalenhallen í Dortmund klukkan 17.
„Við verðum að hefja leikinn af krafti og sýna hörku frá upphafi. Svartfellska liðið hefur á að skipa góðum skyttum og línumönnum. Við verðum að vinna betur úr þeirri stöðu. Í sókninni verðum við að leika boltanum vel og koma okkur í færi,“ sagði Sandra og bætti við:
„Með hundrað prósenta leik þá eru okkur allir vegir færir. Það er frábært að komast í milliriðla og mæta liðum sem við eigum möguleika gegn.“
Tilviljun er að tvær af þremur þjóðum sem íslenska liðið mætir í milliriðlakeppni eru einnig með landsliðinu í riðli í undankeppni EM 2026, Svartfjallaland og Færeyjar.
Lengra viðtal við Söndru er í myndskeiði hér fyrir ofan.
Landslið Íslands á HM kvenna 2025
HM kvenna ”25 – dagskrá, milliriðlar, úrslit, staðan
HM kvenna ”25 – dagskrá, riðlakeppni, úrslit
