Gísli Þorgeir Kristjánsson landsliðsmaður og leikmaður SC Magdeburg segir þátttöku sína með íslenska landsliðinu á EM, sem hefst eftir mánuð, ekki vera í hættu vegna höggs sem hann fékk á hægri síðuna í kappleik á miðvikudag. Gísli Þorgeir segir í viðtali við Handkastið að hann verði að taka stöðuna sér dag frá degi á næstunni.
„Þetta er frekar óljóst eins og staðan er,“ segir Gísli Þorgeir við Handkastið þótt í fréttinni segi á öðrum stað að myndataka í gær bendi til þess að meiðslin séu ekki alvarleg.
Gísli Þorgeir féll harkalega á hægri síðuna í leiknum og var jafnvel óttast að það hafi orðið til þess að rifbein brákaðist.
Magdeburg, sem er taplaust í þýsku deildinni eftir 15 umferðir, sækir Gummersbach heim í Schwalbe Arena á sunnudaginn. Tíminn einn mun skera úr um hvort Gísli Þorgeir tekur þátt í leiknum eða ekki þótt telja verði þátttöku hans sennilegri en ekki.
