Opnað hefur verið fyrir miðasölu á landsleik Íslands og Georgíu í síðustu umferð undankeppni EM karla 2026 sem fram fer í Laugardalshöll laugardaginn 11. maí klukkan 16. Uppselt hefur verið á síðustu heimaleiki karlalandsliðsins í handknattleik. Þess vegna er ekki úr vegi að huga að miðakaupum í tíma því tíminn er fljótur að líða um þessar mundir þegar sól hækkar á lofti með hverjum degi sem líður.
Miðasala er á stubb.is – hlekkur á miðsölu.
Íslenska landsliðið er í efsta sæti þriðja riðils undankeppni EM með átta stig eftir fjórar viðureignir. Georgíumenn sitja í öðru sæti með fjögur stig.
Fjórum dögum fyrir leikinn Georgíu í Laugardalshöll 11. maí sækir íslenska landsliðið Bosníumenn heim í Sarajevo í undankeppni EM.
Snorri Steinn Guðjónsson landsliðsþjálfari valdi í gær leikmennina sem hann ætlar að tefla fram í leikjunum tveimur, gegn Bosníu og Georgíu.
