Vaxandi spennu gætir síðustu dagana áður en þing Alþjóða handknattleikssambandsins hefst í Kaíró. Mikil eftirvænting ríkir vegna væntanlegs forsetakjörs en þrír Evrópubúar, Þjóðverjinn Gerd Butzeck, Slóveninn Franjo Bobinac og Hollendingurinn Tjark de Lange, hafa boðið sig fram gegn Hassan Moustafa, forseta IHF, síðustu 25 ár. Þingið hefst á föstudaginn og stendur fram á sunnudag.
Töluverðar vangaveltur hafa lengi verið um heilsu hins 81 árs gamla Moustafa sem mörgum þykir vera orðinn göngumóður. Í fyrsta sinn síðan Moustafa tók við völdum var hann ekki viðstaddur úrslitaleik á heimsmeistaramóti síðasta sunnudag þegar Noregur og Þýskaland mættust í úrslitaleik. Joel Delplanque varaforseti IHF afhenti verðlaun í mótslok og sleit mótinu, nokkuð sem Moustafa hefur alfarið séð um fram til þessa.
Annir koma í veg fyrir að Moustafa mæti til Rotterdam
Í tilkynningu IHF kom fram að Moustafa hafi ákveðið að hætta við för til Hollands á úrslitaleikinn svo hann gæti undirbúið þingið og greitt úr vanda m.a. vegna vegabréfsáritana þingfulltrúa.
Heimildir Gohandball herma að forseti IHF hafi þurft að sinna um 30 vegabréfsáritunarumsóknum sem hafði verið hafnað í tengslum við þingið í Kaíró. Ekki liggur fyrir hvort þeir sem synjun hafa fengið séu í hópi stuðningsmanna eða andstæðinga forsetans.
Blaise Millo, fyrrverandi framkvæmdastjóri franska handknattleikssambandsins, hefur blandað sér í umræðuna um Moustafa og heilsufar hans í aðdraganda kosninganna. Hann sendi í fyrradag bréf til fulltrúa á þingi IHF þar sem hann veltir fyrir sér framtíð forsetans og spyr opinskátt hvort aldur og heilsa kunni að hafa áhrif á getu hans til að ljúka öðru kjörtímabili.
Yfir 200 þjóðir eiga aðild að IHF en hversu margar eru virkar?
Hættir Moustafa eftir tvö ár?
Það sem meira er að í tölvupósti Millo er gefið í skyn að til sé óformlegur samningur um eftirmann innan IHF; að Moustafa, ef hann verður endurkjörinn til síns síðasta starfstímabils, hafi í hyggju að láta af störfum eftir tvö ár og hleypa að væntanlegum varaforseta sínum, Philippe Bana, í forsetastól árið 2027 eða 2028. Bana, sem er forseti franska handknattleikssambandsins hefur lýst yfir að franska handknattleikssambandið styðji framboð Moustafa. Talið er að Bana taki við sem varaforseti IHF af landa sínum Joel Delplanque.
Samstaða Evrópu rofnar – Frakkar styðja Moustafa
Millo segir að Bana sé með allt niður um sig í fjármálum franska handknattleikssambandsins og eigi ekkert erindi í stól forseta IHF.
Ásgeir situr þing IHF – óvíst hvern HSÍ styður í forsetakjöri
