„Mér finnst mjög mikilvægt hvort sem við leikum við Slóvena eða Egypta að okkar einkennismerki komi fram þótt Egyptar leiki ólíkan handknattleik samanborið við Slóvena. Það er að við náum frumvæðinu, að við séum að sækja hlutina frekar en andstæðingurinn,“ segir Snorri Steinn Guðjónsson landsliðsþjálfari í handknattleik karla þegar handbolti.is hitti hann að máli á hóteli landsliðsins í dag.
Annar leikstíll
Á morgun mætir íslenska landsliðið því egypska í fyrstu umferð milliriðlakeppni heimsmeistaramótsins í handknattleik karla í Zagreb Arena klukkan 19.30. Eins og Snorri Steinn segir þá er talsverður munur á leik Egypta og Slóvena. „Það er margt sem við verðum að skoða, annar leikstíll og aðrar áherslur hjá næsta andstæðingi okkar,“ segir Snorri Steinn sem lagðist strax í nótt yfir leik egypska landsliðsins.
Dugir bara einu sinni
„Strákarnir eiga allt hrós skilið fyrir leikinn í gær en þeir verða að endurtaka leikinn. Leikurinn í gær dugir aðeins einu sinni. Ekkert minna dugir til á morgun gegn Egyptum,“ segir Snorri Steinn sem vill ekki fara framúr sér með því að velta því fyrir sér þeim möguleika sem íslenska liðið verður komið í takist því að leggja Egypta.
Nálgast á sama hátt
„Þetta verður mikilvægur leikur fyrir bæði lið. Eðli málsins samkvæmt þá verður sigurliðið í dúndurgóðum málum. Við megum varast að horfa of langt fram í tímann. Við verðum að nálgast leikinn með svipuðum hætti og í gær, horfa fyrst og fremst á það sem við ætlum að gera,“ segir Snorri Steinn Guðjónsson landsliðsþjálfari í handknattleik karla í samtali við handbolta.is í Zagreb.
Lengra viðtal við Snorra er í myndskeiði ofar í þessari frétt.
A-landsliðs karla – fréttasíða.
HM “25: Leikjadagskrá, milliriðlar, staðan
