- Auglýsing -
- Óhætt er að segja að sinn sé siður í hverju landi. Byrjað er að leika í sænsku bikarkeppninni í handknattleik. Eins og vant er þá er fyrsta kastið leikið í nokkrum fjögurra liða riðlum og leikin er tvöföld umferð. Tvö lið komast áfram á næsta stig keppninnar. Skara HF, sem Aldís Ásta Heimisdóttir leikur með, lék sinn fyrsta leik í riðlakeppni bikarkeppninnar í gær. Liðið sótti heim Kungälvs og tapaði, 32:26. Aldís Ásta skoraði eitt mark í leiknum.
- Ef handbolti.is les rétt úr leikjadagskránni verður leikur Skara-liðið næst við Torslanda á heimavelli annan laugardag.
- Berta Rut Harðardóttir og Jóhanna Margrét Sigurðardóttir ásamt liðsfélögum í Kristianstad hefja leik í bikarkeppninni á morgun með viðureign við grannliðið Karlskrona á heimavelli.
- Viggó Kristjánsson skoraði fimm mörk og Andri Már Rúnarsson fjögur þegar SC DHfK Leipzig Handball vann Alpla Hard, 33:26, í æfingaleik í Austurríki í fyrradag. Rúnar Sigtryggsson er þjálfari SC DHfK Leipzig Handball. Hannes Jón Jónsson þjálfar Alpla Hard og Tumi Steinn Rúnarsson gekk til liðs við félagið í sumar.
- Karlalið ÍR fór fyrir um sólarhring í æfingaferð til Karlskrona í Svíþjóð og verður þar við æfingar næstu daga. Æft verður af miklum dug við góðar aðstæður í sænsku borginni næstu daga undir stjórn Bjarna Fritzsonar. ÍR leikur á ný í Olísdeild karla á næstu leiktíð en stefnt er á að keppni í deildinni hefjist 5. september.
- Þess má geta að Dagur Sverrir Kristjánsson fyrrverandi leikmaður ÍR leikur með sænska úrvalsdeildarliðinu HK Karlskrona. Þegar ÍR og Karlskrona náðu saman um félagaskipti Dags Sverris sumarið 2023 var æfingaferðin sem nú stendur hluti af samkomulaginu.
- Svo virðist sem kvennalið ÍBV í handknattleik sé í æfingabúðum í Þýskalandi um þessar mundir en hvert liðið á fætur öðru er að bregða undir sig betri fætinum þessa dagana og fer í æfingabúðir utan landssteinanna.
- Auglýsing -
