- Auglýsing -
- Andrea Jacobsen skoraði fjögur mörk í fimm skotum og gaf tvær stoðsendingar í sex marka sigri Blomberg-Lippe á Oldenburg, 28:22, í þýsku 1. deildinni í handknattleik í gærkvöld. Díana Dögg Magnúsdóttir var ekki með vegna ristarbrots. Blomberg-Lippe er í fjórða sæti deildarinnar með 25 stig eftir 18 leiki, sjö stigum á undan TuS Metzingen sem er í fimmta sæti.
- Ísak Steinsson markvörður kom ekkert við sögu í gær þegar lið hans, Drammen, vann Sandnes, 32:28, á útivelli í norsku úrvalsdeildinni í handknattleik. Drammen er í 5. sæti deildarinnar með 25 stig eftir 21 leik en alls verða leiknar 26 umferðir.
- Framundan er ferð til Grikklands í dag hjá Ísaki og félögum. Þeir mæta Olympiakos í 16-liða úrslitum Evrópubikarkeppninnar annað kvöld og á sunnudaginn í Chalkida í Grikklandi.
- Storhamar deilir efsta sæti norsku úrvalsdeildar kvenna með Larvik eftir 17 umferðir. Hvort lið hefur 31 stig. Ár og dagur eru liðin síðan Larvik var síðast á toppi úrvalsdeildarinnar. Storhamar vann Oppsal í gær, 29:25. Axel Stefánsson er annar af þjálfurum Storhamar um þessar mundir en hann mætti til leiks á ný í upphafi ársins eftir nokkurt hlé.
- Elías Már Halldórsson og leikmenn Fredrikstad Bkl. gerðu í gærkvöld jafntefli við Haslum Damer, 23:23, á heimavelli í norsku úrvalsdeildinni í handknattleik kvenna. Fredrikstad Bkl. situr í níunda sæti deildarinnar með 12 stig. Næsti leikur Fredrikstad Bkl. verður á heimavelli á laugardaginn gegn Paris 92 í síðustu umferð riðlakeppni 16-liða úrslita Evrópudeildarinnar. Fredrikstad Bkl. á möguleika á sæti í átta liða úrslitum.
- Einar Bragi Aðalsteinsson var ekki í leikmannahópi IFK Kristianstad í gærkvöld þegar liðið vann Skånela IF, 34:27, á útivelli í sænsku úrvalsdeildinni í handknattleik. IFK Kristianstad fór upp í þriðja sæti deildarinnar með 25 stig eftir 21 leik. IFK Kristianstad hefur leikið fleiri leiki en liðin í næstu sætum í kring.
Oftast lesið síðasta sólarhring:
- Auglýsing -
