- Auglýsing -
- TTH Holstebro, sem Arnór Atlason þjálfar, tapaði í gærkvöld fyrir Nordsjælland, 32:30, á útivelli í dönsku úrvalsdeildinni í handknattleik í gærkvöld. Liðin höfðu sætaskipti eftir leikinn. Holstebro settist í níunda sæti með 11 stig eftir 11 leiki. Nordsjælland er í áttunda sæti. Hvort lið hefur 11 stig.
- Stöðuna í dönsku úrvalsdeildinni er að finna hér.
- Teitur Örn Einarsson lék í gær sinn fyrsta leik með Gummersbach í um tvo mánuði þegar Gummersbach vann FH í fimmtu umferð H-riðils Evrópudeildarinnar í handknattleik karla. Teitur Örn var meiddir í il. Hann skoraði ekki í leiknum en tók talsvert þátt og ætti að geta leikið með Gummersbach gegn THW Kiel á heimavelli á föstudaginn í þýsku 1. deildinni. Gummersbach tryggði sér sæti í 16-liða úrslitum Evrópudeildarinnar með sigrinum á FH í gær.
- Guðmundur Bragi Ástþórsson skoraði 2 mörk fyrir Bjerringbro/Silkeborg þegar liðið tapaði á heimavelli fyrir Montpellier, 34:22, í B-riðli Evrópudeildarinnar í handknattleik. Bjerringbro/Silkeborg kemst ekki áfram í keppninni.
- Stiven Tobar Valencia og félagar í Benfica eiga sæti í 16-liða úrslitum Evrópudeildarinnar. Benfica lagði Kadetten Schaffhausen, 39:32, í Lissabon. Stiven Tobar skoraði tvö mörk í leiknum.
- Óðinn Þór Ríkharðsson og samherjar í Kadetten Schaffhausen komast ekki í 16-liða úrslit Evrópudeildarinnar. Tapið fyrr Benfica í gær gerði út um vonir þeirra. Óðinn Þór skoraði þrjú mörk í leiknum. Kadetten getur jafnað Limoges í lokaumferðinni að stigum en stendur höllum fæti í innbyrðisleikjum gegn franska liðinu verði þau jöfn að stigum í öðru og þriðja sæti C-riðils eftir síðustu umferðina á þriðjudaginn.
- Þorsteinn Leó Gunnarsson skoraði þrjú mörk þegar Porto tapaði fyrir Melsungen í F-riðli Evrópudeildarinnar, 32:27. Engu að síður er Porto komið áfram í 16-liða úrslit ásamt Melsungen en Vardar og Valur eru úr leik.
- Elvar Örn Jónsson skoraði þrjú mörk fyrir Melsungen sem er með fullt hús stiga í F-riðli eftir fimm leiki. Arnar Freyr Arnarsson var ekki á meðal þeirra sem skoruðu fyrir Melsungen í leiknum í gær.
- Tryggvi Þórisson skoraði eitt mark fyrir sænska meistaraliðið IK Sävehof þegar það vann óvæntan sigur á franska liðinu Fenix Toulouse, 33:30, í H-riðli Evrópudeildarinnar í Toulouse í gær. Þetta var fyrsti sigur Sävehof í keppninni. Sävehof fær Gummersbach í heimsókn í síðustu umferð 32-liða úrslita riðlakeppninni á þriðjudaginn. Fenix Toulouse mætir í Kaplakrika og leikur við Íslandsmeistara FH.
- Auglýsing -
