- Auglýsing -
- Tvær af öflugri handknattleikskonum Serbíu á síðustu árum, Dragana Cvijić og Andrea Lekić, hafa ákveðið að gefa kost á sér á nýjan leik í landsliðið. Þeim lyndaði ekki við Uroš Bregar fyrrverandi landsliðsþjálfara. Nú þegar Bregar er hættur hafa Cvijić og Lekić boðað komu sína í landsliðið sem mætir Slóveníu í umspili HM 9. og 12. apríl. Serbneska landsliðið hafnaði í 21. sæti á EM í síðasta mánuði.
- Franski landsliðsmaðurinn Yanis Lenne kveður Montpellier í sumar og gengur til liðs við Veszprém í Ungverjalandi í sumar. Lenne leikur í hægra horni. Hann hefur verið hjá Montpellier frá 2019.
- Sebastian Karlsson fer einnig frá Montpellier í lok leiktíðar í vor. Sænski landsliðsmaðurinn hefur samið við franska meistaraliðið PSG.
- Domagoj Duvnjak hefur staðfest að hann gefi ekki oftar kost á sér til leikja með króatíska landsliðinu að loknu heimsmeistaramótinu í handknattleik sem fram fer síðar í þessum mánuði, m.a. í heimalandi hans. Duvnjak er 36 ára gamall og hefur leikið með landsliðinu í 19 ár. Hann framlengdi nýverið samning sinn við THW Kiel til eins árs, fram á vorið 2026.
- Auglýsing -
