- Auglýsing -
- Efsta lið þýsku 1. deildarinnar í handknattleik karla, MT Melsungen, tapaði fyrir Eisenach, 32:31, í Eisenach í gærkvöld. Elvar Örn Jónsson skoraði fjögur mörk og átti fjórar stoðsendingar fyrir MT Melsungen. Arnar Freyr Arnarsson lék fyrst og fremst í vörn liðsins.
- Eisenach-liðið er er mjög erfitt heim að sækja og fengu Melsungen-menn að finna fyrir því að þessu sinni. Melsungen er áfram efst í deildinni með 18 stig eftir 11 leiki. Hannover–Burgdorf sem mætir SC Magdeburg í Hannover í dag er tveimur stigum á eftir.
- Teitur Örn Einarsson lék sinn fyrsta leik í þýsku 1. deildinni í um tvo mánuði þegar Gummersbach tók á móti THW Kiel og tapaði með sex marka mun, 30:24. Teitur Örn skoraði eitt mark og átti þrjár stoðsendingar.
- Elliði Snær Viðarsson lék ekki með Gummersbach vegna meiðsla. Guðjón Valur Sigurðsson er þjálfari liðsins.
Stöðuna í þýsku 1. deildinni og í fleiri deildum í Evrópu er að finna hér. - Elmar Erlingsson skoraði fjögur mörk, eitt þeirra úr vítakasti, þegar HSG Nordhorn-Lingen vann TuS Ferndorf, 33:27, á heimavelli í 2. deild þýska handknattleiksins í gær. Nordhorn er áfram í 13. sæti deildarinnar. Sigurinn hvetur vonandi leikmenn liðsins til dáða. TuS Ferndorf er á hinn bóginn í 5. sæti.
- Daníel Þór Ingason lék á ný með Balingen-Weilstetten í gærkvöld þegar liðið vann HSC 2000 Coburg, 34:25, á heimavelli, í þýsku 2. deildinni. Hann skoraði ekki að þessu sinni en átti eina stoðsendingu. Balingen-Weilstetten er í öðru sæti deildarinnar með 17 stig eftir 12 viðureignir, er stigi á eftir Bergischer HC.
- Guðmundur Bragi Ástþórsson og félagar í Bjerringbro/Silkeborg fögnuðu sigri á heimavelli gegn Mors-Thy, 32:28, í 12. umferð dönsku úrvalsdeildarinnar í gærkvöld. Guðmunudur Bragi skoraði eitt mark úr vítakasti.
- Bjerringbro/Silkeborg er í fjórða sæti deildarinnar með 17 stig eftir 12 leiki, er þremur stigum fyrir ofan Skanderborg AGF sem Kristján Örn Kristjánsson, Donni, leikur með.
- Tryggvi Þórisson var ekki á meðal þeirra sem skoruðu mörk fyrir IK Sävehof þegar liðið vann Guif frá Eskilstuna í Partille í gær, 28:26. IK Sävehof er í sjötta sæti með 12 stig eftir 10 leiki
- Arnar Birkir Hálfdánsson skoraði fimm sinnum þegar Amo HK sótti heim efsta lið sænsku úrvalsdeildarinnar, Ystads IF HF, í gærkvöld. Amo HK tapaði með tíu marka mun, 35:25. Liðið áfram í hópi þeirra neðstu, í 12. sæti af 14 með sex stig eftir 11 leiki.
- Stöðuna í sænsku úrvalsdeildinni er að finna hér ásamt stöðunni í fleiri deildum evrópsks handknattleiks.
- Auglýsing -
