- Auglýsing -
- Eftir ársfjarveru frá handboltavellinum þá sneri Eyjamaðurinn Hákon Daði Styrmisson út á völlinn í gærkvöld með liði sínu, Eintracht Hagen, þegar það sótti Ludwigshafen heim í þýsku 2. deildinni í handknattleik. Hákon Daði skoraði tvö mörk í tveggja marka tapi, 27:25.
- Eintracht Hagen er í 11. sæti af 18 liðum deildarinnar með 28 stig þegar fjórum leikjum er ólokið af 34.
- Teitur Örn Einarsson skoraði tvö mörk og gaf tvær stoðsendingar þegar Gummersbach, undir stjórn Guðjóns Vals Sigurðssonar, steinlá í heimsókn til Lemgo, 35:26, á heimavelli Lemgo í gær. Leikurinn var liður í þýsku 1. deildinni í handknattleik. Elliði Snær Viðarsson er frá keppni vegna meiðsla.
- Gummersbach er í 9. sæti með 30 stig að loknum 27 leikjum af 34.
- Heiðmar Felixsson aðstoðarþjálfari Hannover-Burgdorf fagnaði á hinn bóginn sigri með með liði sínu í heimsókn til Eisenach, 31:26. Frábær leikur Hannover-Burgdorf í fyrri hálfleik lagði grunn að sigrinum.
- Hannover-Burgdorf er í þriðja sæti þýsku 1. deildarinnar með 43 stig eftir 28 leiki. Melsungen og Füchse Berlin eru í tveimur efstu sætunum með 44 stig hvort auk þess að eiga leik inni á Hannover-Burgdorf.
- Haukur Þrastarson skoraði ekki mark fyrir Dinamo Búkarest þegar liðið vann Potaissa Turda, 42:30. Með sigrinum tryggði Dinamo, sem hefur að vanda talsverða yfirburði í úrvalsdeildinni, sér meistaratitilinn í Rúmeníu í 21. skipti.
- Dagur Gautason skoraði eitt mark fyrir Montpellier í tveggja marka tapi í heimsókn til Toulouse í gær í frönsku 1. deildinni í handknattleik. Montpellier er í öðru sæti deildarinnar en hefur leikið tveimur leikjum fleiri en Nantes sem er stigi á eftir í þriðja sæti. PSG er efst með 47 stig, fjórum fyrir ofan Montpellier og á auk þess leik til góða. Toulouse, sem mætti FH í haust í riðlakeppni Evrópudeildarinnar, situr í fjórða sæti frönsku 1. deildarinnar.
Vinsælt lesefni:
- Auglýsing -
