- Lærisveinar Halldórs Jóhanns Sigfússonar í TTH Holstebro töpuðu með minnsta mun, 30:29, í grannaslag við Mors-Thy í dönsku úrvalsdeildinni í handknattleik í gærkvöld. Holstebro er þar með fallið í níunda sæti deildarinnar fyrir lokaumferðina. SønderjyskE skaust upp í áttunda sætið með sigri á Nordsjælland.
- Átta efstu liðin taka þátt í úrslitakeppninni um meistaratitilinn, þau sem fyrir neðan eru taka sæti í keppni um að forðast fall úr deildinni. TTH Holstebro mætir Ribe-Esbjerg í lokaumferð deildarinnar 5. apríl og getur sá leikur skorið úr um hvort liðið fari í úrslitakeppnina í efri hlutanum ef SønderjyskE nær ekki stigi úr leik sínum á heimavelli gegn Skanderborg Aarhus.
- Ásgeir Snær Vignisson og samherjar í Helsingborg höfnuðu í 13. og næst síðasta sæti sænsku úrvalsdeildarinnar en keppni lauk í gær. Helsingborg tapaði fyrir Alingsås með sex marka mun 32:26, á heimavelli. Tapið kom ekki að sök þar sem Redbergslid tapaði einnig og féll úr deildinni. Redbergslid stóð verr að vígi en Helsingborg fyrir lokaumferðina þótt hvort lið væri með 16 stig. Ásgeir Snær skoraði ekki mark í leiknum í gær. Helsingborg fer í umspil um að forðast fall úr deildinni.
- Redbergslid hefur átt sæti í sænsku úrvalsdeildini sleitulaust frá 1983. Þar af leiðandi sætir fall liðsins úr deildinni töluverðum tíðindum.
- Tryggvi Þórisson skoraði eitt mark fyrir Sävehof þegar liðið vann Hallby, 33:29, í lokaumferð sænsku úrvalsdeildarinnar í gær. Sävehof hafnaði í öðru sæti deildarinnar. IFK Kristinstad varð deildarmeistari.
- Bjarni Ófeigur Valdimarsson skoraði tvö mörk í 10 marka tapi IFK Skövde fyrir Hammarby IF HF, 30:20, í sænsku úrvalsdeildinni í gær. IFK Skövde hafnaði í sjötta sæti deildarinnar og mætir Ystads í átta liða úrslitum úrslitakeppninnar.
- HC Motor, sem Roland Eradze er aðstoðarþjálfari hjá, gerði jafntefli við Eisenach í þýsku 2. deildinni í gærkvöld, 28:28. Leikið var í Eisenach. HC Motor er í 17. sæti af 20 liðum deildarinnar. Eisenach er í þriðja sæti tveimur stigum og einu leik á eftir TuS N-Lübbecke.