- Auglýsing -
- Holstebro vann Midtjylland, 31:24, í lokaleik áttundu umferðar dönsku úrvalsdeildarinnar í handknattleik karla í gærkvöld. Halldór Jóhann Sigfússon er aðstoðarþjálfari Holstebro sem er í sjötta sæti deildarinnar með níu stig.
- Sigtryggur Daði Rúnarsson sem lánaður var til austurríska liðsins Alpla Hard frá ÍBV um nýliðna helgi var ekki í leikmannahópi Hard þegar liðið mætti Sporting í Lissabon í gær í C-riðli Evrópudeildarinnar í gær. Hann verður væntanlega gjaldgengur með liðinu í næstu umferð eftir viku. Hard tapaði leiknum naumlega, 31:30. Hannes Jón Jónsson er þjálfari liðsins.
- Þau tímamót áttu sér stað í Alsír á dögunum að kona var í fyrsta sinn kjörin forseti handknattleikssambands landsins. Hún heitir Karima Taleb og fékk 67 atkvæði á ársþingi handknattleikssambandsins en karlkyns frambjóðandi hlaut 20 atkvæði. Taleb er um leið fyrst kvenna til þess að ná kjöri sem formaður eða forseti í hópíþróttasambandi í Alsír.
- Kórónuveiran gerir mönnum víða lífið leitt í Evrópu um þessar mundir og því miður ekki í fyrsta sinn. Tveir leikmenn danska kvennalandsliðsins greindust smitaðir í gær og verða fjarri góðu gamni á næstunni. Danska landsliðið býr sig undir Evrópumeistaramótið sem hefst 4. nóvember í þremur löndum, Slóveníu, Svartfjallalandi og Norður Makedóníu. Danska handknattleikssambandið sagði í tilkynningu í gær að áfram fari allir sem eru í danska undirbúningshópnum í veirupróf með reglubundnum hætti.
- Talsmaður Handknattleikssambands Evrópu sagði við norska fjölmiðla í gær að allir þátttakendur á EM kvenna verði að fara tvisvar í kórónuveirupróf á fyrstu fjórum dögum eftir komuna til þátttökulands. Verður það gert til þess að ganga úr skugga um að enginn komi með veiruna með sér á keppnisstað. Ekki stendur til að eftir þetta verði reglubundin próf hjá þátttakendum. Grímunotkun áhorfenda verður valfrjáls.
- Aðeins hálfum mánuði áður en Evrópumót kvenna í handknattleik hefst hefur franska landsliðið orðið fyrir áfalli. Laura Glauser, markvörður, er meidd og verður ekki með liðinu á EM. Camille Depuiset markvörður Metz hefur verið kölluð inn í æfingahópinn í stað Glausers.
- Auglýsing -
