- Auglýsing -
- Hallgrímur Jónasson hefur verið ráðinn markmannsþjálfari meistaraflokka karla og kvenna hjá handknattleiksdeild Fram. Einnig á Hallgrímur að hafa með höndum markmannsþjálfun yngri flokka. Hallgrímur er einn reyndasti markmannsþjálfari landsins og hefur auk þess sinnt þjálfun yngri flokka um árabil.
- Hallgrímur hefur áður starfað sem þjálfari og aðstoðarþjálfari hjá Fram, ÍR, Selfossi, Fjölni og Víkingi. Hann hefur einnig verið markarvarðaþjálfari hjá meistaraflokki Víkings og Fjölni og meistaraflokki hjá ÍR. Þá á hann að baki farsælan feril sem handknattleiksmarkmaður. Til viðbótar er Hallgrímur faðir Viktors Gísla markvarðar landsliðsins og franska liðsins Nantes.
- Arnar Birkir Hálfdánsson skoraði átta mörk fyrir Amo Handboll í sex marka sigri liðsins á Skånela í síðari viðureign þeirra í 16-liða úrslitum sænsku bikarkeppninnar í gær. Sigurinn færði Amo Handboll sæti í átta liða úrslitum bikarkeppninnar. Liðin skildu jöfn í fyrri leiknum.
- Arnar Birkir og félagar sækja HK Karlskrona heim á föstudaginn í upphafsleik sænsku úrvalsdeildarinnar. Bæði lið eru nýliðar í deildinni. Þrír Íslendingar leika með HK Karlskrona, Dagur Sverrir Kristjánsson, Ólafur Andrés Guðmundsson og Þorgils Jón Svölu Baldursson auk Phil Döhler markvarðar sem lék með FH um árabil.
- Tvö mál voru á borði aganefndar HSÍ þegar nefndin kom saman í gær. Sylvía Björt Blöndal, Aftureldingu, fékk rautt spjald í viðureign liðsins við ÍR á síðasta laugardag og Benedikt Gunnari Óskarssyni var sýnt rautt spjald í leik Vals og FH á mánudagskvöldið. Hvorugt þeirra fær leikbann. Aganefnd bendir Benedikt og Sylvíu á að hafa í huga stighækkandi áhrifum útlokana vegna leikbrota.
- Auglýsing -
