- Auglýsing -
- Danski handknattleiksmaðurinn Mikkel Hansen er á meðal 23 danskra íþróttamanna sem vann mál sem höfðað var gegn veðmálafyrirtækinu Bet365 fyrir ólöglega notkun á ímynd þeirra í tengslum við auglýsingar veðmálafyrirtækisins. Meðal annarra þekktra danska íþróttamanna sem var í hópnum sem málið höfðaði voru knattspyrnumennirnir Christian Eriksen og Kasper Schmeichel og badmintonmaðurinn Viktor Axelsen. Alls var hópnum dæmdar 4,7 milljónir danskra króna í bætur, jafnvirði 94 milljóna íslenskra króna.
- Sænska handknattleikssambandið hagnaðist um 23 milljónir skr, jafnvirði liðlega 300 milljóna íslenskra króna á þátttöku sinni í mótahaldi heimsmeistaramóts karla í janúar á síðasta ári og heimsmeistaramóti kvenna sem fram fór í desember. HM karla hélt sænska sambandið í samvinnu við pólska handknattleikssambandið en HM kvenna var samstarfsverkefni sænska, norska og danska handknattleikssambandanna.
- Fyrr á árinu kom fram að hagnaður danska handknattleikssambandsins af HM kvenna hafi verið ríflega 100 milljónir íslenskra króna. Norska handknattleikssambandið tapaði á sama tíma á sínum hluta mótsins þótt eitt og annað hafi verið skorið við nögl í samanburði við það sem sneri m.a. að fjölmiðlum þegar borið var saman við aðbúnað í Danmörku.
- Slóvenar og Egyptar skildu jafnir, 27:27, í vináttulandsleik í handknattleik karla í Celje í Slóveníu í gærkvöld. Leikurinn er liður í undirbúningi beggja landsliða fyrir handknattleikskeppni Ólympíuleikanna sem hefjast undir lok þessa mánaðar.
- Auglýsing -
