- Auglýsing -
- Harpa María Friðgeirsdóttir skoraði eitt mark þegar lið hennar TMS Ringsted gerði jafntefli við Søndermarkens IK, 29:29, í næst efstu deild danska handknattleiksins í gær. TMS Ringsted er í 10. sæti af 12 liðum deildarinnar með sjö stig eftir níu leiki. Harpa María flutti til Danmerkur síðsumars vegna mastersnáms í iðnaðarverkfræði við DTU-háskólann í Lyngby á Sjálandi. Gekk um leið til liðs við TMS Ringsted en áður var hún með Fram.
- Daníel Þór Ingason og félagar í HBW Balingen-Weilstetten unnu GWD Minden, 30:28, á heimavelli í 2. deild þýska handknattleiksins í gær. Daníel Þór skoraði ekki mark í leiknum. Sigurinn færði HBW Balingen-Weilstetten upp í annað sæti deildarinnar með 19 stig eftir 14 leiki, liðið er stigi á eftir HC Bergischer sem á leik inni. Hüttenberg er í þriðja sæti með 19 stig að loknum 14 leikjum eins og HBW Balingen-Weilstetten. GWD Minden er í fjórða sæti með 17 stig.
- Aron Pálmarsson skoraði tvö mörk en Bjarki Már Elísson ekkert þegar lið þeirra, ungverska meistaraliðið Veszprém, vann Carbonex-Komló, 37:25, á heimavelli í gær í 12. umferð ungversku 1. deildarinnar. Veszprém er í efsta sæti með 22 stig eftir 12 leiki. Pick Szeged er í öðru sæti með 20 stig en hefur lokið 11 viðureignum.
- Janus Daði Smárason og liðsfélagar í Pick Szeged fá Ferencváros, FTC, í heimsókn í dag.
- Viktor Gísli Hallgrímsson var með Wisla Plock í gær þegar liðið vann PGE Wybrzeże Gdansk, 34:25, á heimavelli í 14. umferð pólsku úrvalsdeildarinnar í handknattleik í gær. Staðan var jöfn í hálfleik, 15:15. Því miður hefur reynst þrautin þyngri að finna upplýsingar um varin skot í leiknum en víst er að Viktor Gísli tók þátt í leiknum sem var fjórtándi sigurleikur Wisla Plock í deildinni á leiktíðinni. Liðið er taplaust í efsta sæti.
- Stöðuna í mörgum deildum evrópsks handknattleiks er að finna hér.
- Auglýsing -
