- Auglýsing -
- Haukur Þrastarson hafði það náðugt þegar lið hans Dinamo Búkarest vann CSM Fágaras, 40:29, á heimavelli í áttundu umferð rúmensku úrvalsdeildarinnar í handknattleik í gær. Haukur kom ekkert við sögu hjá Dinamo enda í eldlínunni með liðinu í fyrradag gegn Sporting í Meistaradeild Evrópu. Dinamo er efst í deildinni með 24 stig eftir átta leiki, þremur stigum á undan Potaissa Turda.
- David Davis þjálfari Dinamo Búkarest fékk sigurinn í afmælisgjöf. Hann varð 48 ára í gær.
- Orri Freyr Þorkelsson skoraði tvö mörk í þremur skotum þegar lið hans Sporting Lissabon vann Nazaré Dom Fuas AC, 42:23, í 10. umferð portúgölsku 1. deildarinnar í gærkvöld. Leikið var í Lissabon. Sporting hefur unnið alla leiki sína í deildinni til þessa.
- Tékkneski handknattleiksmaðurinn Matej Klima, sem leikur undir stjórn Rúnars Sigtryggssonar hjá þýska 1. deildarliðinu Leipzig, er úr leik það sem eftir er leiktíðar. Klima meiddist illa á hné í viðureign Leipzig og Melsungen á fimmtudagskvöldið.
- Sænski vinstri hornamaðurinn Jerry Tollbring leikur heldur ekki fleiri leiki fyrir Füchse Berlin á keppnistímabilinu. Hann meiddist á hné í viðureign Füchse Berlin gegn PSG í Meistaradeild Evrópu í fyrrakvöld.
- Auglýsing -
