- Auglýsing -
- Jóhanna Margrét Sigurðardóttir skoraði eitt mark þegar lið hennar, Kristianstad HK, vann Höörs HK H65, 33:24, í upphafsleik þriðju umferðar sænsku úrvalsdeildarinnar í handknattleik í gær. Leikurinn fór fram á heimavelli Höörs-inga og var þetta fyrsta tap þeirra á leiktíðinni. Berta Rut Harðardóttir skoraði ekki mark fyrir Kristianstad HK.
- Stöðuna í sænsku úrvalsdeildinni og í fleiri deildum evrópsks handknattleiks er að finna hér.
- Hvorki gengur né rekur hjá Elíasi Má Halldórssyni og liðsmönnum norska kvennaliðsins Fredrikstad Bkl. Ekki er nóg með að liðið rekur lestina án stiga eftir fimm umferðir í úrvalsdeildinni heldur féll liðið úr leik í 16-liða úrslitum bikarkeppninnar í gær fyrir Byåsen, 30:28. Byåsen er einnig án stiga í úrvalsdeildinni.
- Næsti leikur Fredrikstad Bkl. verður í fyrri umferð forkeppni Evrópudeildar á laugardaginn gegn Amicitia Zürich á heimavelli.
- Kristjana Arnarsdóttir hefur verið ráðin aðstoðarmaður Ásmundar Einars Daðasonar, mennta- og barnamálaráðherra. Kristjana hefur síðustu átta ár verið íþróttafréttakona á RÚV við góðan orðstír.
- Hinn þrautreyndi þýski handknattleiksþjálfari Martin Schwalb er mættur til starfa á ný eftir hlé frá þjálfun vegna stjórnarstarfa fyrir HSV Hamburg. Schwalb er kominn í þjálfarateymi HC Erlangen og verður í fyrsta sinn með liðinu í kvöld þegar það mætir Gummersbach í 32-liða úrslitum bikarkeppninnar í Þýskalandi. Erlangen hefur gengið á afturlöppunum til þessa í deildinni og tapað fjórum fyrstu leikjum sínum.
- Johannes Sellin sem verið hefur þjálfari Erlangen síðan í vor verður áfram í einhverju hlutverki innan félagsins. Schwalb er fjórði þjálfarinn hjá Nürnbergliðinu á jafn mörgum árum. Eru stjórnendur félagsins harðlega gagnrýndir fyrir stjórnleysi innan félagsins.
- Norski landsliðsmaðurinn Sander Sagosen gerir sér vonir um að vera mættur á ný út á handknattleiksvöllinn eftir fimm til sex vikur. Eins og áður hefur komið fram meiddist Sagosen á öxl í síðustu viku í leik Kolstad og Zagreb í Meistaradeild Evrópu. Vonir standa til að Sagosen hafi sloppið betur en áhorfðist.
- Auglýsing -
