- Auglýsing -
- Danski handknattleiksmaðurinn Emil Madsen hefur samið við þýska meistaraliðið THW Kiel. Tekur samningurinn gildi eftir ár og er til fjögurra ára. Madsen sló í gegn í vetur með danska meistaraliðinu GOG. Kiel gerði tilraun til þess að klófesta Madsen í vor en GOG sagði það ekki koma til greina að missa Madsen á sama tíma og Simon Pytlick og Lukas Jørgensen fara til Flensburg og þjálfarinn Nicolej Krickau.
- Í fyrradag gekk rúmenska meistaraliðið Dinamo Búkarest frá kaupum á serbneska markverðinum Vladimir Cupara frá ungverska meistaraliðinu Telekom Veszrprém. Cupara átti ár eftir af samningi sínum í Ungverjalandi. Hann hefur samið við Dinamo til ársins 2026 en upphaflega stóð til að hann kæmi endurgjaldslaust eftir ár.
- Í stað Cupara hefur Veszprém krækt í spænska markvörðinn Ignacio Bioska frá Wisla Plock í Póllandi.
- Danski línumaðurinn Rasmus Meyer hefur yfirgefið herbúðir Fredericia HK, sem Guðmundur Þórður Guðmundsson þjálfar, og samið við Wetzlar. Guðmundur Þórður hefur þegar krækt í Evgeni Pevnov og Mads Emil Møller til þess að leika á línunni á næsta keppnistímabili. Þar af leiðandi þrengdist að Meyer.
- Danmerkurmeistarar GOG leituðu ekki langt yfir skammt eftir línumanni þegar Lukas Jørgensen færði sig um set til Flensburg eftir nýliðna leiktíð. Forráðamenn GOG sömdu í staðinn við Anton Lindskog sem leikið hefur með Flensburg síðustu tvö ár. Lindskog var þar áður í fimm ár línumaður Wetzlar og enn áður með Kristianstad.
- Auglýsing -
