- Auglýsing -
- Orri Freyr Þorkelsson var næst markahæstur hjá Sporting í átta marka sigri liðsins á Benfica, 37:29, í uppgjöri Lissabon-liðanna í fjórðu umferð úrslitakeppni fjögurra efstu liða portúgölsku 1. deildarinnar í gær. Orri Freyr skoraði átta mörk. Salvador Salvador skoraði einu marki fleira.
- Stiven Tobar Valencia var ekki leikmannahópi Benfica í leiknum. Benfica er í þriðja sæti í fjögurra liða keppninni. Sporting er efst, fimm stigum á undan Porto sem á leik við Maritimo á eyjunni Madeira í dag.
- Hlé verður gert á úrslitakeppninni áður en tvær síðustu umferðirnar verða leiknar 24. og 31. maí. Sem stendur er Sporting með fimm stiga forskot í efsta sæti. Porto getur minnkað muninn í tvö stig með sigri á Madeira í dag.
- Elmar Erlingsson fór á kostum í gær og skoraði fimm mörk og átti sjö stoðsendingar þegar lið hans, Nordhorn-Lingen, tapaði naumlega á heimavelli fyrir Bergischer HC, 34:33. Johannes Wasielewski skoraði sigurmark Bergischer HC á síðustu sekúndu leiksins.
- Arnór Viðarsson, samherji Elmars úr meistaraliði ÍBV 2023, skoraði eitt mark fyrir Bergischer HC sem er í efsta sæti 2. deildar og hefur þegar tryggt sér sæti í efstu deild á næstu leiktíð.
- Tjörvi Týr Gíslason var ekki í leikmannahópi Bergischer HC að þessu sinni. Arnór Þór Gunnarsson er annar þjálfara Bergischer HC.
- Grétar Ari Guðjónsson varði 11 skot, 29%, á þeim 45 mínútum sem hann var í marki Ivry í fjögurra marka tapi, 33:29, fyrir Nantes í frönsku 1. deildinni í handknattleik í gær. Nantes, sem komið er í undanúrslit Meistaradeildar Evrópu, er í öðru sæti deildarinnar en Ivry er í neðsta sæti. Fall blasir við liðinu.
- Þrátt fyrir mikinn mun á liðunum í stöðutöflunni var leikurinn í Nantes í gær hörkuspennandi lengst af. Hér fyrir neðan er samantekt frá leiknum þar sem sjá má Grétar Ara verja nokkrum sinnum afar vel.
- Auglýsing -
