- Auglýsing -
- Sara Dögg Hjaltadóttir lék með Gjerpen HK Skien á nýjan leik eftir meiðsli í gær þegar liðið vann Randesund öruggalega á útivelli í norsku 1. deildinni í handknattleik, 30:18. Sara Dögg skoraði fimm mörk, þar af tvö úr vítakasti. Gjerpen HK Skien er efst í deildinni með 17 stig eftir níu leiki.
- Hannes Jón Jónsson og lærisveinar hans í austurríska meistaraliðinu Alpla Hard unnu Aon Fivers, 33:29, á heimavelli í gær og komst þar með upp í annað sæti deildarinnar. Hard er nú aðeins einu stigi á eftir grannliðinu Bregenz sem er í efsta sæti þegar 11 umferðum er lokið.
- Harpa Rut Jónsdóttir og félagar hennar í svissneska meistaraliðinu LK Zug féllu í gær úr keppni í 32-liða úrslitum Evrópubikarkeppninnar í handknattleik með sex marka tapi fyrir hollenska liðinu Cabooter Handbal Venlo, 37:31, í síðari viðureign liðanna sem fram fór í Hollandi. Zug vann fyrri viðureignina með tveggja marka mun á heimavelli, 25:23. Harpa Rut skoraði ekki mark í leiknum í Hollandi í gær.
- Anton Rúnarsson skoraði tvö mörk í fimm skotum og átti eina stoðsendingu þegar lið hans, TV Emsdetten, tapaði fyrir Dessauer með níu marka mun, 31:22, í þýsku 2. deildinni í handknattleik í gær. TV Emsdetten er í 12. sæti af 20 liðum deildarinnar.
- Örn Vésteinsson Östenberg og félagar í Tønsberg Nøtterøy unnu loksins í gær leik í norsku úrvalsdeildinni en liðinu hefur ekki vegnað sem skildi á keppnistímabilinu. Tønsberg Nøtterøy lagði Sandefjord, 32:30, á heimavelli. Örn skoraði þrjú mörk. Tønsberg Nøtterøy lyftist þar með upp úr 14. og neðsta sæti upp í 12. sæti.
- Lið Kadetten Schaffhausen, sem Aðalsteinn Eyjólfsson þjálfar, komst áfram í bikarkeppninni í Sviss i gær með öruggum sigri á Espoirs, 35:23, á útivelli.
- Auglýsing -
