- Auglýsing -
- Nicholas Satchwell fyrrverandi markvörður KA og áður markvörður færeyska landsliðsins hefur skrifað undir nýjan samning um áframhaldandi þjálfun kvennaliðs Neistans í Þórshöfn í Færeyjum. Satchwell tók við þjálfun liðsins á síðustu leiktíð þegar hann varð að leggja skóna á hilluna vegna meiðsla. Undir stjórn Satchwell vann Neistinn silfurverðlaun í bikarkeppninni og bronsverðlaun í úrvalsdeildinni.
- Norski landsliðsmaðurinn Alexandre Blonz tekur ekki þátt í leikjum danska meistaraliðsins Aalborg Håndbold á fyrstu vikum nýs keppnistímabils. Blonz kom til félagsins í sumar frá GOG. Hann meiddist á hné snemma á þessu ári og eftir aðgerð fékk hann blóðtappa. Blonz segir við Nordjyske að hann vonist til þess að vera orðinn klár í slaginn í október.
- Sprenging varð í notkun samfélagsmiðla Handknattleikssambands Evrópu, EHF, í sumar. M.a. skoðuðu 26 milljónir myndskeið á samfélagsmiðlasíðum EHF frá Evrópumóti 19 ára landsliða kvenna sem lauk í Podgorica í Svartfjallalandi síðasta sunnudag. Er það meiri aðsókn en var að samfélagsmiðlum á EM 20 ára landsliða karla síðasta sumar.
- Um 10 þúsund manns hafa keypt aðgöngumiða á kveðjuleik sem THW Kiel stendur fyrir í kvöld fyrir Patrick Wiencek sem lagði skóna á hilluna í vor eftir 13 ár hjá liðinu. Meðal þeirra sem taka þátt í leiknum eru Guðjón Valur Sigurðsson og Alfreð Gíslason. Guðjón Valur var samherji Wiencek og Alfreð samdi við Wiencek á sínum tíma.
- Þýskir fjölmiðlar velta fyrir sér hvort kveðjuleikir af þessu tagi heyri ekki sögunni til. Kostnaður við leikinn er talsverður auk þess sem hætta á meiðslum sé nokkur.
- Anders Eggert nýr þjálfari KIF Kolding segir markmið liðsins vera eitt fyrir komandi tímabil; endurheimta sæti í úrvalsdeildinni en liðið féll úr deildinni í vor. Ekki komi til greina að þetta forna stórveldi í dönskum handknattleik festist í næst efstu deild.
- Auglýsing -
