- Auglýsing -
- Silja Arngrímsdóttir Müller markvörður hjá Val er ein þriggja markvarða sem er í æfingahópi færeyska landsliðsins sem kemur saman til æfinga í Þórshöfn 3. til 9. mars. Færeyska landsliðið nýtir þá viku til undirbúnings fyrir leiki gegn Litáen í umspili um HM-sæti sem verða 9. og 13. apríl.
- Haukur Þrastarson hefur jafnað sig á veikindum sem héldu honum frá viðureign Dinamo Búkarest og Veszprém í Meistaradeild Evrópu í handknattleik á fimmtudagskvöld. Hann skoraði fjögur mörk fyrir Dinamo í stórsigri á Focsani, 35:23, í rúmensku 1. deildinni á sunnudaginn. Dinamo hefur unnið 15 leiki og gert eitt jafntefli í rúmensku deildinni á leiktíðinni og er langefst. Potaissa Turda er í öðru sæti, níu stigum á eftir Dinamo.
- Monique Tijsterman þjálfari austurríska kvennalandsliðsins í handknattleik hefur skrifað undir nýjan samning við austurríska handknattleikssambandið sem gildir fram yfir HM 2027. Tijsterman tók við þjálfun landsliðsins fyrir ári af Herbert Müller sem hafði verið þjálfari landsliðsins um langt árabil.
- Þýska handknattleiksliðið Rhein-Neckar Löwen hefur samið við sænska landsliðsmanninn Edwin Aspenbäck frá og með næsta keppnistímabili. Aspenbäck er örvhent skytta sem tók þátt í öllum leikjum sænska landsliðsins á HM. Hann leikur nú með TTH Holstebro undir stjórn Arnórs Atlasonar.
- Einn kemur þá annar fer og Jon Lindenchrone Andersen hefur samið við danska úrvalsdeildarliðið Skjern frá og með sumrinu. Andersen er nú leikmaður Rhein-Neckar Löwen. Andersen sem er 28 ára gamall Dani og örvhentur skrifar undir þriggja ára samning við Skjern.
- Auglýsing -
